Вам поможет Пояс Пресвятой Богородицы

Богородице Приснодево, человеков покрове, Ризу и Пояс пречистаго Твоего телесе, державное граду Твоему обложение даровала еси, безсеменным рождеством Твоим нетленна пребывающи, о Тебе бо и естество обновляется и время. Темже молим Тя мир граду Твоему даровати и душам нашим велию милость.

Кондак, глас 2:

Богоприятное Твое чрево, Богородице, объемший Пояс Твой Честный, держава граду Твоему необорима, и сокровище есть благих неоскудно, едина рождшая Приснодево.

Другой кондак, глас 4:

Честнаго Пояса Твоего положение празднует днесь Твой, препетая, храм, и прилежно взывает Ти: радуйся, Дево, христиан похвало.

Молитва 1-я:

О, Благодатная Богомати, Пренепорочная и Обрадованная, да обрадуемся и мы, немощныя людие Твои, яко Силою и Властию Твоею сокрушиши всех врагов наших видимых и невидимых, да прославим и возвеличим Тя, яко Непобедимую Победу Всесильную.

Молитва 2-я:

Царице моя преблагая, надеждо моя Богородице, приятелище сирых и странных предстательнице, скорбящих радосте, обидимых покровительнице! Зриши мою беду, зриши мою скорбь, помози ми яко немощну, окорми мя яко странна. Обиду мою веси, разреши ту, яко волиши: яко не имам иныя помощи разве Тебе, ни иныя предстательницы, ни благия утешительницы, токмо Тебе, о Богомати, яко да сохраниши мя и покрыеши во веки веков. Аминь.

Акафист Святому и Пречестному Поясу Пресвятой Богородицы

Тропарь, глас 5:

Яко некрадомо богатство, Пояс Твой Честный Присноблаженная, и благих подание имуще, Обитель Ватопедская взывает Ти, препояши со благоговением, притекающия ны к нему, силою его божественною, и крепость льстиваго врага разруши, спасение верным Чистая.

Кондак, глас 6:

Богоприемное Твое чрево Богородице, объемший Пояс Твой Честный, держава стаду Твоему необорима, и сокровище есть благих неоскудно, едина рождшая Приснодево.

Кондак 1:

Ко пречестному Богородице божественному Поясу Твоему, со благоговением притекающе, исполняемся просвещения и благоухания премiрнаго, но яко пучино сущи Дево благости, препояши ны силою его Непорочная, зовущия:

Радуйся Поясе пречестный.

Икос 1:

Ангели невидимо Пояс Твой святый со страхом обстояще Отроковице, мы же во плоти сущия, с верою припадаем к нему, освящение приемлюще, и во благоговении вопием:

Радуйся Поясе Богородицы,

радуйся сияние всему мiру.

Радуйся Непорочныя Девы преПоясание,

радуйся Церкве всея сокровище.

Радуйся Поясе многоценный Владычицы небес,

радуйся цвете благоуханный благочестивых христиан.

Радуйся яко тело Девыя преПоясаеши,

радуйся яко крепость льстиваго ослабеваеши.

Радуйся светильниче благодати всесветлый,

радуйся источниче чудес неизсякаемый.

Радуйся имже вернии светозаряются,

радуйся имже врази упраздняются.

Радуйся Поясе пречестный.

Кондак 2:

Воззри Богородительнице, оком благоутробным, ко иже верою ко святому Ти Поясу, якоже источнику вод освященных Честно припадающих, и просящих благодати Твоея, необоримую бо силу темже подаждь вопиющим:

Аллилуйя.

Икос 2:

Бысть Богородице Честнаго Ти Пояса принесение во Царский Град, источник веселия истиннаго, царицу бо скоро исцелил еси, нам же благодать обильную присно подает вопиющим:

Радуйся источниче радости вечныя,

радуйся чаше душепищнаго брашна.

Радуйся имже Всечистая Дево преПоясася,

радуйся иже во Афоне яко свет возсия.

Радуйся яко Зою царицу излечил еси,

радуйся яко точиши всем веселие умное.

Радуйся пленице всесвятая Чистыя Богородицы,

радуйся стрело огненосная на врага человекоубийцу.

Радуйся радости вина и ходатаю,

радуйся тихое душам пристанище.

Радуйся Христу благочестно связующий,

радуйся страстей стремления упраздняющий.

Радуйся Поясе пречестный.